A Garda Civil imputou en calidade de investigados a un veciño do Carballiño de 58 anos de idade e a un veciño de Silleda de 32 anos de idade como supostos autores dun delito de falsidade documental tras ser detectados circulando pola autovía A-6, ao seu paso por Becerreá, nun vehículo con matrículas pintadas a man. Segundo informou o Instituto Armado, os axentes observaron, á altura do punto quilométrico 458 da A-6, a un vehículo de alta gama cunhas placas supostamente pintadas a man. Ante isto, procederon a identificar aos ocupantes do turismo. A continuación, solicitáronlles a documentación do vehículo e achegaron un permiso de circulación expedido no ano 2023 e un boletín de circulación no que se consignaba que estaba a realizar unha proba do turismo.

Neste sentido, a Garda Civil comprobou que a empresa que figuraba no boletín de circulación para realizar a proba do turismo e expedir a placa de matrícula provisional atopábase extinguida, “presupondo a actuación dunha persoa xurídica nun documento público, cando realmente a mesma carece de personalidade xurídica para poder emitir unha declaración de vontade válida, simulando, por tanto, a participación neste tipo de acto, cando o mesmo legalmente non pode ter lugar”. Así mesmo, no marco da investigación localizáronse no interior do vehículo outras dúas placas de cartón pintadas a man cunha numeración diferente á autorizada polo permiso de circulación do turismo. As persoas investigadas e as dilixencias policiais foron postas a disposición xudicial.