A Garda Civil detivo en Madrid a catro presuntos autores de roubar cobre dos serradoiros dunha empresa de transformación de madeira situada no municipio lucense de Guitiriz.
Segundo informou o Instituto Armado nunha nota de prensa, os feitos ocorreron o pasado mes de setembro, cando os agora detidos accederon de madrugada ao interior das instalacións desta empresa e, supostamente, subtraeron o cableado de cobre dos serradoiros, ademais de ocasionar danos na infraestrutura e varios vehículos por un valor en total de 100.000 euros.
Así mesmo, a Garda Civil explicou que os acusados cargaron o vehículo co material e despois dirixíronse a unha zona apartada para proceder ao seu pelado. Unha vez finalizaron, desprazáronse esa mesma madrugada ata o seu domicilio en Madrid. Alí, posteriormente, vendían o subtraído en chatarrerías, “o que dificultaba a identificación dos autores, do material e dos lugares de venda”.
Ao ter constancia destes feitos, iniciouse unha investigación para determinar a identidade dos autores e, deste xeito, púidose identificar a catro integrantes dunha banda, residentes en Madrid, como os supostos autores, así como o vehículo utilizado. Os detidos pasaron a disposición do xulgado de Instrución nº 2 de Vilalba.
