Un home resultou ferido á primeira hora deste mércores nun accidente de tráfico rexistrado no municipio lucense de Muras. O condutor quedou atrapado no vehículo, envorcado, e tivo que ser liberado polos bombeiros. Os feitos ocorreron sobre as 7.00 horas deste mércores na LUP- 3406, ao seu paso por Muras, onde o condutor perdeu o control do vehículo e este quedou envorcado fóra da estrada. Aínda que o home e único ocupante estaba consciente, presentaba lesións que debían ser valoradas polo equipo de Urxencias Sanitarias de Galicia-061. Así, unha vez foi liberado polos Bombeiros de Vilalba, a dotación sanitaria conduciu o ferido ao centro hospitalario de referencia.