Axentes da Policía Local de Lugo detiveron este fin de semana a un home que quebrantou unha orde de afastamento con respecto doutro home, co que tivera un altercado previo. Segundo informaron fontes policiais, os feitos ocorreron na tarde do pasado venres, cando unha patrulla de Policía Local foi requirida por un home en rúa Pintor Villamil. O home explicoulles que, momentos antes, vira nas inmediacións do seu domicilio a outro home que, uns días antes, agredíralle cunha arma branca e ao que denunciara.

O xulgado impúxolle ao denunciado unha orde de afastamento de 200 metros con respecto á vítima e ao seu domicilio, pero os axentes localizaron ao sospeitoso a uns 10 metros desa vivenda. Por iso, tras comprobar que a medida de afastamento seguía en vigor, procederon á súa detención.

INTERVENCIÓN EN HOSTALARÍA

Por outra banda, a Policía Local tamén tivo que intervir, ao mediodía do sábado, nun establecemento de hostalaría da rúa Rafael Veiga, xa que un cliente estaba a molestar ao resto de persoas.

Ao chegar, os axentes comprobaron que o home en cuestión, que estaba a realizar unha consumición, atopábase baixo os efectos do alcol, e advertíronlle de que debía cesar na súa conduta. Esa persoa, abandonou entón o local de forma voluntaria.

OUTRAS INTERVENCIÓNS

A Policía Local de Lugo tamén informou do levantamento de acta de infracción respecto de dúas persoas que foron sorprendidas practicando a venda ambulante sen autorización no mercadillo de Frigsa o pasado venres.

Tamén durante o fin de semana, o 092 recibiu un aviso para acudir a rúa Mar Cantábrico, pola caída de laxas á vía pública desde o tellado dun inmoble. Ao lugar acudiron os bombeiros, que retiraron as laxas caídas e os axentes de Policía aseguraron a zona para evitar riscos.

Finalmente, con respecto á seguridade viaria, a Policía denunciou o fin de semana a dous condutores que circulaban cunha taxa de alcoholemia superior ao límite penal, nas rúas Anselmo Sampedro e Portugal.

Outros dous condutores foron denunciados por circular baixo os efectos da droga (THC), ambos na rúa San Roque, e catro condutores máis foron sancionados por alcoholemia positiva por baixo do límite penal (infracción administrativa).

Por outra banda, en Rúa das Fontiñas foi localizado un condutor circulando a pesar de que nunca obtivera o permiso de conducir; e tamén foron sancionados varios condutores de patinetes eléctricos, nun caso por facer caso omiso dos sinais dos axentes, e no resto de casos, por circular dúas persoas no mesmo patinete.