A Policía Local de Lugo detivo a un mozo de 21 anos acusado de agredir á súa parella nunha vivenda da cidade e de escondela dentro dun canapé para evitar que a visen os axentes que se personaron alertados polos veciños. Os feitos sucederon na tarde do 19 de maio, cando os veciños dun edificio da zona sur alertaron de que escoitaban berros dun home nunha vivenda e o pranto desconsolado dunha muller, polo que consideraron que podía estar “en grave risco”.

Á chegada dos axentes, o home negou os feitos e, aínda que admitiu que tiña parella, dixo que estaba só na vivenda. Con todo, durante a realización dunha inspección ao piso, os policías atoparon á muller dentro do canapé do dormitorio. A muller, “en estado de nerviosismo”, manifestou manter unha discusión coa súa parella, “que ao ser moi nervioso gritoulle moito e que nun momento dado ‘fóronselle os brazos ao pescozo’, causándolle erosións”, dixo aos axentes.

A Policía solicitou a presenza dunha ambulancia do 061 para o seu traslado a un centro médico e procedeu á detención do home, de 21 anos, e o seu traslado a dependencias policiais, onde se instrúen dilixencias para o Xulgado correspondente.