A Policía Nacional detivo a cinco persoas integrantes dunha banda organizada que se dedicaba ao trapicheo de cocaína e pastillas de viagra na cidade de Lugo. Ademais, nos rexistros atopáronse varios obxectos furtados que permitiron esclarecer ata o momento sete roubos. Segundo informa a Policía nun comunicado, os detidos son catro homes e unha muller. O máximo responsable da trama foi enviado a prisión pola autoridade xudicial.
A investigación iniciouse hai varias semanas ao detectar vendas de sustancias estupefacientes no barrio de Recatelo. Así, tense coñecemento da existencia dunha rede que distribuía papelinas por toda a cidade. O responsable da trama facilitaba a droga aos tres distribuidores repartidos nos barrios de Recatelo e A Piringalla, con vendas tamén nunha das rúas adxacentes á avenida da Coruña.
Nos rexistros domiciliarios interviñéronse un quilo de cocaína e diferentes sustancias como 200 pastillas para disfunción eréctil, así como material de manipulación, papelinas preparadas para a venda, balanzas de precisión, teléfonos móbiles e sustancias de corte para a droga, entre outros.
Igualmente, nos rexistros atopáronse diferentes obxectos relacionados con roubos realizados na cidade desde finais do pasado ano, polo que se lles imputa aos titulares da vivenda onde foron localizados un delito de receptación. De tal forma, puidéronse esclarecer ata o momento sete roubos con forza, pero crese que superan a decena. Espérase ao longo da semana poder identificar todos os obxectos e os seus lexítimos propietarios. En concreto, recuperáronse ordenadores, videoconsolas, material de mecánica e trades.
