Dúas persoas resultaron feridas leves en dúas saídas de vía producidas con apenas 20 minutos de diferenza na autovía A-6 nos municipios lucenses de Begonte e de Guitiriz.
O primeiro deles produciuse ás 15,11 horas deste martes á altura da parroquia de San Martiño de Pacios, na A-6, en dirección A Coruña. Unha persoa resultou ferida leve tras chocar o vehículo no que circulaba contra a varanda.
Un particular daba aviso desta saída de vía ao 112 Galicia e, a continuación, os operadores informaron os servizos sanitarios, á Garda Civil de Tráfico, ao GES Friol-Pas e ao servizo de mantemento de estradas.
Posteriormente, ás 15,30 horas, no quilómetro 527 desta mesma autovía, ao seu paso por Guitiriz –dirección A Coruña–, outro vehículo sufría unha saída de vía.
Neste caso, varios particulares alertaban ao 112, que mobilizou ata o lugar ao GES Friol-Pas, aos Bombeiros de Vilalba, á Garda Civil de Tráfico, a Protección Civil, ao servizo de mantemento da estrada e ao Servizo de Urxencias Sanitarias de Galicia-061, que atendeu á condutora no punto.
