A Audiencia Provincial de Lugo acollerá o vindeiro mércores o xuízo contra tres homes acusados dun delito contra a saúde pública para os que Fiscalía pide entre dous e catro anos de prisión. Os feitos remóntanse a 2020 cando un dos acusados foi interceptado pola Policía Nacional nun establecemento de lecer nocturno con tres ovoides de resina de cannabis, das que non causan grave dano á saúde, cun peso neto de 26,61 gramos.
Ademais, estaba acompañado doutro dos acusados que atoparon no seu poder MDMA, considerada que causa grave dano á saúde, cun peso neto de 18,8 gramos e riqueza do 79,83 %, así como interviñéronlle 38 euros fraccionados. Finalmente, o outro acusado dedicábase ao tráfico de sustancias estupefacientes, en concreto de resina de cannabis, sendo a persoa que fornecía a sustancia a un dos acusados.
Posteriormente este acusado autorizou a entrada e rexistro no seu domicilio onde lle localizaron tres pezas de resina de cannabis, considerada como das que non causan grave dano á saúde, un coitelo e unha bolsa con restos de sustancia “aparentemente haxix e recortes plásticos”.
Por todo iso, Fiscalía solicita para dous dos acusados a pena de dous anos de prisión por un delito contra a saúde pública na modalidade que non causa grave dano á saúde, así como a multa de 250 euros para un deles e 350 euros para o outro. O terceiro dos acusados enfróntase a unha pena de prisión de catro anos de cárcere por un delito contra a saúde pública, na modalidade que causa grave dano á saúde, e a unha multa de 350 euros.
