A circulación na estrada N-6 entre as provincias de Lugo e León, que se cortou na madrugada deste venres por un accidente con dous camións e unha furgoneta, quedou restablecida á primeira hora desta tarde, confirmaron fontes da DXT e da Subdelegación do Goberno en Lugo.
Así, unha vez retirados os vehículos sinistrados e a carga, púidose reabrir o viario e recuperar o tráfico, que fora desviado polo antigo trazado da N-6, ao seu paso polo Castro.
Dáse a circunstancia de que, precisamente ese tramo da N-V estaba habilitado desde o verán de 2022 como alternativa tras o colapso do viaduto do Castro na A-6. Por outra banda, na autoestrada A-6 permanece cortado o carril esquerdo, en dirección Arteixo, debido ao desprendemento de rocas e terra dun noiro na tarde deste xoves. Ante este incidente, habilitouse un desvío entre os quilómetros 438 e 457, con paso alternativo pola N-6.
Á primeira hora desta tarde, restableceuse a circulación en ambos os sentidos na autoestrada, aínda que dita circulación é dun só carril por sentido no tramo afectado polo derrube.
