Dúas persoas resultaron feridas de gravidade tras saírse da vía o vehículo no que viaxaban no municipio lucense de Navia de Suarna. Segundo informou o 112, os Bombeiros de Sarria tiveron que facer uso do seu material de excarceración para liberar a unha das persoas. Ambas foron trasladadas ao centro hospitalario de referencia.
Pasaban cinco minutos das 5,30 horas cando o 112 Galicia recibiu a chamada dun particular que estaba no lugar do accidente, o quilómetro 26 da LU-722, en Freixís. Xa durante esta conversa indicaba que un dos implicados parecía incapaz de abandonar polos seus propios medios o vehículo, que caeu por un terraplén e deixara múltiples restos espallados na estrada.
Unha vez alí, os servizos de emerxencias confirmaron a situación e os Bombeiros de Sarria procederon a excarcerar a un dos feridos. A continuación, ambos foron evacuados en estado grave en ambulancia ao centro hospitalario.
Neste operativo participaron, ademais de Urxencias Sanitarias de Galicia-061 e os Bombeiros, a Garda Civil de Tráfico e os servizos de mantemento das estradas, que procederon coa limpeza da vía. Á súa vez, unha estrada local próxima quedou afectada pola caída dunhas árbores a consecuencia do accidente.
