O Xulgado do Penal número 1 de Lugo xulgará o vindeiro venres, día 21, a unha muller acusada de “reiterada conduta violenta” cara ao seu fillo de 17 anos, ao que tentou golpear cun martelo e ao que cravou un desaparafusador.
Segundo recolle o escrito de acusación fiscal, a muller conviviu co seu fillo entre os meses de setembro e outubro de 2021, “mantendo de forma reiterada unha conduta violenta e agresiva cara ao mesmo”. Neste período, a acusada comezou a agredir ao menor “propinándolle varios golpes, mediante puñadas, en diversas partes do corpo, tirándolle do cabelo, rabuñándolle e mordéndolle“, explica o escrito.
Ademais, tentou propinarlle un golpe na cabeza cun martelo, o cal non conseguiu, e agrediuno tamén cunha copa de cristal e cun desaparafusador, que lle cravou na man esquerda. Ao día seguinte, prosegue o fiscal, “a acusada agrediu novamente ao seu fillo” no interior do seu domicilio, “propinándolle unha puñada na perna”.
O 14 de outubro, o xulgado impuxo unha orde de afastamento do menor. Agora, o Ministerio Público considera os feitos constitutivos de dous delitos de malos tratos no ámbito familiar, polo que pide para a muller dous anos de prisión e prohibición de achegarse ao seu fillo por un período de seis anos.
