A Garda Civil detivo na localidade lucense de Mondoñedo a un veciño de Pontevedra, de 49 anos de idade, acusado de roubar un robot cortacéspede de propiedade municipal o pasado 20 de marzo. Segundo trasladou o Instituto Armado, o presunto autor foi localizado co obxecto roubado no municipio de Trabada. Cando foi detido, o home trataba de pór en marcha o aparello.
Xa en sede policial, o detido confesou o roubo “ante as evidencias mostradas”. As dilixencias foron remitidas ao Xulgado de Instrución nº un de Mondoñedo.
INVESTIGADO POR UN INCENDIO FORESTAL
Por outra banda, a Garda Civil de Lugo tamén informou da imputación en calidade de investigado do suposto autor dun delito de incendio forestal ocorrido o pasado 19 de febreiro na parroquia de San Juan de Arroxo, en Baralla.
Nunha nota de prensa, a Garda Civil explicou que se constata que o incendio se ocasionou por unha imprudencia grave na queima de residuos forestais, “vulnerando a lexislación sectorial de Galicia para realizar este tipo de queimas”. As dilixencias policiais foron remitidas ao Xulgado de Instrución de Garda de Becerreá (Lugo).
