Unha moza lucense foi agredida esta madrugada por tres individuos que presuntamente trataron de subtraerlle a carteira, o diñeiro en efectivo, o cartón bancario e o teléfono móbil. A moza tivo que ser atendida por unha ambulancia do 061.
Segundo sinalou a Policía Local nun comunicado, os feitos tiveron lugar ás 2,10 horas deste xoves cando a Sala do 092 recibiu información telefónica sobre unha agresión que se estaba producindo na Praza de Pío XII.
Os axentes, á súa chegada, atoparon á moza sentada no chan e sendo atendida por varios viandantes. Así mesmo, identificaron os testemuños e trataron de recoller unha descrición dos presuntos autores, que non foron localizados.
AUXILIO A UN VECIÑO
Noutra orde de asuntos, ás 10,50 horas deste mércores, unha patrulla da Unidade Territorial de Policía de Barrio foi comisionada nun inmoble da rúa Camiño Real, despois de que o 061 pedise axuda para a evacuación dun enfermo que se atopaba no seu domicilio.
Tras valorar a situación, o enfermo foi sacado ao exterior, por parte do Servizo de Bombeiros, a través dunha xanela parte traseira do edificio, para o que foi necesario restrinxir o tráfico rodado.
