Os dous ocupantes dun vehículo tiveron que ser excarcerados este sábado tras saírse da vía o coche no que circulaban no municipio lucense de Cospeito. Segundo informa o 112, o accidente tivo lugar no punto quilométrico 14 da LU-120. Foi un particular o que deu aviso ao servizo, uns minutos despois das 19,30 horas.
Os Bombeiros de Vilalba acudiron ao lugar do accidente para utilizar o material de excarceración e liberar ás dúas persoas atrapadas a causa do impacto.
Tras recibir as primeiras atencións no propio lugar, as dúas persoas que circulaban no vehículo foron trasladadas ao Hospital Universitario Lucus Augusti. Ademais dos bombeiros e o 061, no operativo tamén participaron a Garda Civil de Tráfico e o servizo de mantemento da vía de circulación.
