Bombeiros de Vilalba extinguiron un incendio nunha nave de transportes situada en Rábade que, aínda que afectou a parte da mercadoría almacenada, non deixou danos persoais.

Segundo traslada o 112 Galicia, pouco antes das 15,00 horas recibiu a chamada dun particular que alertaba dun incendio nunha das naves situadas no polígono industrial de Rábade.

Descoñecían a orixe do incendio, pero ao abrir as portas do local, dedicado ao sector dos transportes, saía unha importante cantidade de fume de cor negra e confirmaban, desde os instantes iniciais, que non había persoas feridas as chamas nin intoxicadas polo fume.

O 112 coordinou a acción de Urxencias Sanitarias de Galicia-061, dos Bombeiros de Vilalba e da Garda Civil. Así pois, a actuación dos servizos de extinción conseguiu limitar os danos e impediu a propagación das chamas, que finalmente afectaron a un estante no que se almacenaba material de caucho, que ardeu por completo. Os bombeiros deron por finalizada a súa intervención no punto ás 16,00 horas.