A Garda Civil detivo a catro individuos dun grupo delituoso como presuntos autores dun delito continuado de roubo con forza nas cousas cometido entre os meses de abril e maio nunha granxa de Outeiro de Rei, na que subtraeron material metálico.

Segundo informou o Instituto Armado, os feitos tiveron lugar nas instalacións dunha granxa situada no termo municipal de Outeiro de Rei, onde os presuntos autores subtraeron diverso material metálico das instalacións valoradas nuns 40.000 euros.

As investigacións policiais lograron identificar os catro compoñentes do grupo delituoso, os cales, asegura a Benemérita, “operaban de maneira organizada; mentres uns vixiaban, outros subtraían o material e unha terceira persoa procedía á venda dos obxectos”.

Nestes meses, puntualizou a Garda Civil de Lugo, os individuos implicados venderon uns 19.000 quilos de diverso material supostamente subtraído.

As persoas detidas en relación con estes feitos, veciñas de Lugo, foron postas a disposición xudicial.