A Garda Civil sorprendeu no termo municipal de Abadín ao condutor dun ciclomotor que circulaba cun casco de ciclista e que obtivo resultado positivo na proba de alcoholemia.
Segundo informou o Instituto Armado, o individuo foi interceptado á altura do punto quilométrico 3,600 da estrada LU-121 (O Santo-Moncelos), ao seu paso por Abadín. O condutor portaba un casco de ciclista, “o cal carece da correspondente homologación para o vehículo utilizado e que, ademais, atopábase gravemente deteriorado, apreciándose a primeira ollada varias roturas“, destacan as mesmas fontes.
Unha vez interceptado o vehículo, os gardas civís someteron ao condutor, veciño de Abadín, de 38 anos de idade, ás probas reguladas para determinar se puidese atoparse baixo a influencia de bebidas alcohólicas, nas que obtivo resultado positivo.
Ao comprobar posteriormente a placa de matrícula do ciclomotor, os gardas constataron que este figura de baixa definitiva para a circulación desde o ano 2009, e carece, por tanto, de seguro obrigatorio e ITV, ao que se engade a carencia de espellos retrovisores.
Por estes feitos tramitáronse boletíns de denuncia, que foron remitidos á Xefatura Provincial de Tráfico de Lugo, á vez que se procedeu á inmovilización do vehículo a motor ao non estar autorizada a súa circulación polas vías públicas.
ELEMENTOS HOMOLOGADOS
A Garda Civil lembra a “necesidade e obrigatoriedade” de facer uso dos “preceptivos elementos de seguridade homologados e en adecuadas condicións de conservación”, xa que o non facer uso dos mesmos é constitutivo dunha infracción administrativa que levaría unha sanción económica e, na maior parte dos casos leva aparellada a detracción puntos do crédito asignado ao permiso de condución.
