O guindastre municipal de Lugo tivo que retirar unha furgoneta de matrícula holandesa dedicada á exportación debido a que se lle caducou o correspondente permiso de circulación en España, que tiña un prazo de validez de 14 días.
Segundo informa o Concello, ocorreu na tarde do mércores, cando un policía especializads en vehículos estranxeiros que se atopaba fóra de servizo observou esta furgoneta estacionada na rúa do Franco.
Así, tras comprobar que xa carecía do permiso, o axente deu aviso á sala do 092 e acudiu ata o lugar unha patrulla da Unidade Territorial de Policía de Barrio, que retirou co guindastre municipal o automóbil e mobilizouno ao depósito ata que o seu titular solicite a matriculación temporal ou definitiva en España.
COCHE SEN ITV
Así mesmo, tamén durante a tarde do mércores, a Policía Local denunciou ao propietario dun vehículo por un delito de emprego ilexítimo de certificado público, xa que o coche levaba coa ITV caducada desde o 2020 pero tiña pegada un adhesivo que indicaba que estaba en vigor ata 2023.
