A Policía Local de Lugo detivo a un home de 27 anos de idade por quebrantar unha orde de afastamento ao ser denunciado pola súa nai cando chamaba “moi alterado” á porta da vivenda na que estaba a muller.

Segundo informou a Policía Local, ás 11,50 horas deste pasado 7 de xuño unha patrulla da Unidade Territorial de Policía de Barrio foi enviada á rúa Río Ulla porque unha muller denunciou que o seu fillo estaba “moi alterado” e chamaba á porta da súa vivenda, a pesar de ter unha orde de afastamento en vigor.

Os axentes atoparon ao mozo de 27 anos diante da porta da vivenda e comprobaron que hai unha orde emitida por un xulgado de Lugo que lle prohibe estar a menos de 500 metros do domicilio.

Por iso, procederon á detención deste mozo e ao seu traslado a dependencias policiais, para a instrución de dilixencias para o xulgado de garda.