Axentes da Policía Local de Lugo detiveron a un home por violencia no ámbito familiar por agredir á súa nai no marco dunha discusión nunha vivenda no barrio da Residencia.

Segundo relatou a Policía Local, sobre as 22,00 horas do pasado 4 de xuño unha patrulla do Grupo Operativo Nocturno foi enviada a un edificio do barrio da Residencia porque nunha vivenda había unha discusión entre varios membros dunha familia.

Ao chegar os axentes foron informado pola vítima de que un fillo seu chegara a casa “moi alterado”, indican as mesmas fontes, e agredina con varios golpes no pescozo e na cara, á vez que rompeu diverso mobiliario da casa, tras o que se ausentou da vivenda.

Os axentes que interviñeron auxiliaron á agredida, que rexeitou asistencia médica, e localizaron ao autor nas inmediacións do edificio, tras o que procederon á súa detención. O home recoñeceu que no transcurso dunha discusión empuxara á súa nai e foi conducido a dependencias policiais, onde se instruíron dilixencias para a súa remisión á autoridade xudicial competente.