A Policía Local de Lugo investiga as causas do accidente sufrido por un home achado inconsciente cunha bicicleta de pedaleo asistido nas inmediacións na capital luguesa. Segundo informou a Policía Local, ás 00,55 horas do domingo pasado a Sala do 092 recibiu información sobre unha persoa tirada na Avenida da Coruña, en Lugo.
No lugar, os axentes do Grupo Operativo Nocturno comprobaron que se trata dun home que se atopaba “inconsciente e sangrando pola cabeza“. Ademais, nas proximidades había unha bicicleta de pedaleo asistido, pero non acharon testemuñas que puidesen orientar sobre o sucedido.
Os policías da Unidade de Atestados iniciaron expediente e as investigacións necesarias para tentar esclarecer o sucedido. O home foi inicialmente atendido por unha ambulancia do 061 e finalmente trasladado ao HULA para unha valoración posterior.
