A Policía Local de Lugo denunciou cinco ‘gorrillas’ interceptados na zona do Hospital Universitario Lucus Augusti (HULA) por realizar esa actividade ilegal de aparcacoches, un dos cales foi proposto para sanción de ata 10.400 euros.

Segundo informou a Policía Local, durante a mañá deste pasado xoves estableceuse un dispositivo na contorna do HULA para o control da actividade ilegal de aparcacoches, coñecidos como ‘gorrillas’.

No dispositivo participaron efectivos da Unidade Territorial de Policía de Barrio da Policía Local de Lugo, no que empregaron vehículos policiais camuflados. En concreto, nesa actuación foron denunciadas cinco persoas por infracción á Ordenación de Circulación e ao Regulamento Xeral de Circulación.

Así mesmo, destacaron as mesmas fontes policiais, a un lle realizaron acta de denuncia por infracción da Lei de Seguridade Cidadá por “desobediencia aos axentes da autoridade no exercicio das súas funcións”, porque “deambulaba constantemente entre a beirarrúa e a calzada, xerando un manifesto perigo para si mesmo e para os usuarios”.

O individuo, puntualiza a Policía Local, foi requirido ata en dúas ocasións “para que cesase na súa actitude” e, engade, ausentouse do lugar nun primeiro momento, pero “máis tarde foi observado de novo realizando a mesma conduta”. Por iso, foi proposto para sanción de ata 10.400 euros, concluíron as mesmas fontes.