Unha muller de 71 anos, veciña da Coruña, faleceu nun accidente na autovía A-6 ao seu paso polo municipio de Guitiriz, nun sinistro que deixa a outra muller ferida grave.
Segundo informa a Garda Civil, no punto quilométrico 528,6 (sentido Lugo), na parroquia de Trasparga, tivo lugar unha colisión entre dous turismos ás 12,50 horas deste sábado.
Nun dos coches viaxaba a muller que faleceu con outro tres ocupantes que resultaron ilesos, mentres no outro automóbil unha muller quedou ferida grave e o outro ocupante resultou ileso.
Segundo a información recollida polo 112 Galicia, os Bombeiros de Vilalba interviñeron para liberar a unha das persoas accidentadas, ao quedar atrapada no interior dun dos vehículos sinistrados.
Foi necesario interromper o tráfico nun dos carrís en sentido da circulación a Lugo para asegurar as condicións de seguridade na zona. Varias persoas alertaron do sucedido, polo que o 112 avisou tamén a 061 e servizo de mantemento de estradas.
