Axentes da Garda Civil detiveron no municipio de Vilalba a dous mozos veciños da Coruña de 26 e 29 anos de idade por un delito de roubo con forza nun establecemento hoteleiro, no que subtraeron material eléctrico. Segundo informou o Instituto Armado, os feitos tiveron lugar cando unha patrulla deste corpo observou nun dos laterais dun establecemento hoteleiro a presenza dunha furgoneta que cortaba a circulación na vía.

As mesmas fontes puntualizaron que a furgoneta tiña as “portas traseiras completamente abertas cara a unha das portas que dá acceso” ao recinto. Os axentes observaron a dous individuos, os mozos agora detidos, que subtraeron material eléctrico do interior do establecemento hoteleiro, sinalou a Benemérita. As dúas persoas detidas en relación con estes feitos foron postas a disposición xudicial.