Axentes da Policía Local de Lugo tiveron que auxiliar a un menor, un adolescente de 16 anos de idade, que estaba inconsciente e tirado en plena rúa, concretamente no Carril do Mercado, no centro histórico da cidade.

Os feitos sucederon ás 23:30 horas do pasado sábado -28 de agosto- cando unha patrulla da Policía de Barrio foi avisada de que un mozo estaba tirado, inconsciente, na citada rúa. Ao chegar ao lugar indicado, os axentes comprobaron que o rapaz estaba inconsciente e con espuma nos beizos, con síntomas evidentes de ter bebido.

Ante o seu estado, decidiron solicitar “a presenza inmediata” dos servizos sanitarios de emerxencias. Ademais, mentres esperaban a chegada da ambulancia, os axentes conseguiron que o mozo recuperase a consciencia e colocárono en posición de seguridade.

Os sanitarios, tras comprobar o seu estado, tomaron a decisión de evacualo de urxencia a un centro hospitalario, acompañado polos seus pais, que se presentaron no lugar tras ser avisados do sucedido.

Esa mesma noite, ao redor de unha da madrugada, outro mozo foi trasladado ao HULA nunha ambulancia do 061, ao atopalo tirado na contorna do Atrio da Catedral de Lugo unha patrulla da Policía Local e comprobar que non podía incorporarse polos seus propios medios