Axentes da Policía Nacional adscritos á Comisaría Provincial de Lugo detiveron a dous homes aos que atribúe a distribución de droga na zona A Milagrosa, e aos que se interviñeron un centenar de dose de heroína e cocaína.

Segundo fontes policiais, a detención produciuse esta semana, cando os afentes interceptaron os dous sospeitosos á súa chegada de Ferrol (onde mercaran a droga, para a súa posterior distribución na cidade de Lugo).

No momento do arresto, os dous homes levaban encima unhas 30 doses de cocaína e 70 de heroína. Ambos foron postos a disposición do xulgado, que acordou a posta en liberdade en tanto non se celebre o xuízo. Con esta intervención, a Policía dá por “pechado” un punto negro de venda de droga habitual no barrio da Milagrosa.

Por outra banda, nos últimos días, a Policía Nacional de Lugo tamén detivo a outro home, tamén por un delito contra a saúde pública, tras sorprendelo realizando varias vendas de sustancia estupefacientes (que levaba escondida nun oco dun anel).

A droga foi intervida aos compradores mentres que, ao arrestado, fóronlle incautados dous billetes de 10 euros, presuntamente procedentes da venda da sustancia ilícita.