Axentes da Policía Nacional adscritos á Comisaría Provincial de Lugo, do servizo de Radiopatrullas, detiveron a un home veciño de Pontevedra como autor dun delito de roubo con violencia a unha muller a punta de tesoiras, á que subtraeu diñeiro e o móbil na rúa.

Segundo informou a Policía Nacional, os feitos sucederon na noite deste martes cando unha muller que camiñaba despois da súa xornada laboral polo centro da cidade foi abordada por un home que a ameazou cunhas tesoiras, para que lle entregase o diñeiro e posteriormente o móbil.

Á muller que foi intimidada coas tesoiras caeulle o bolso ao chan do cal o ladrón colleu o diñeiro que había na carteira, para, posteriormente, pedir que lle entregase o teléfono móbil que portaba, e como esta non llo entregou quitoullo da man. Despois fuxiu do lugar en dirección á Praza do Ferrol.

A vítima puido parar un vehículo na zona, cuxas ocupantes chamaron á sala do 091, e alertou o ocorrido, polo que unha dotación policial de Radiopatrullas personouse no lugar e solicitou toda a información dos feitos. E comunicaron ao resto de patrullas, mentres deron asistencia á muller vítima do roubo.

Con iso as demais patrullas en servizo puxéronse en marcha para localizar ao autor do roubo, coa descrición dada pola vítima. Nas inmediacións do antigo cuartel de San Fernando onde, tras uns arbustos, puideron ver como se movía algo e ao darlle o alto, viron a un home que tirou un obxecto ao chan.

Unha vez puideron velo con claridade e comprobaron que se podía tratar do autor do roubo, xa que a descrición coincidía co relatado pola muller obxecto do roubo. Ao tempo comprobaron que o obxecto arroxado ao chan eran unhas tesoiras e no cacheo realizado, atopóuselle o teléfono que fora subtraído no roubo.

Con todo iso procedeuse á detención e traslado a dependencias policiais da rúa Chantada do presunto autor do roubo con violencia, co fin de tramitar o correspondente atestado que será remitido á autoridade xudicial na mañá deste mércores, xunto co detido.