A Garda Civil de Lugo procedeu ao comiso de dous vehículos cuxos titulares se consideran “usuarios de risco multireincidentes” ante un “elevado número ilícitos penais contra a seguridade viaria que cometeran”.
Así o informou o Instituto Armado, que relatou que se fixo en cumprimento do acordado en sentenzas xudiciais, en virtude das cales se procedía ao comiso e posterior adxudicación deses vehículos á administración pública (Xefatura Provincial de Tráfico), que decidiu “a destrución dos mesmos”.
Estas actuacións prodúcense tras ser condenados en “numerosas sentenzas firmes por condución baixo a influencia de bebidas alcohólicas e tras de ser privados por sentenza firme do permiso de condución”, concreta a Benemérita. “Estes comisos puidéronse levar a cabo tras comprobar que os vehículos eran os habitualmente utilizados por estes usuarios de risco”, engade.
Estes turismos serán dados de baixa definitiva do rexistro da Dirección Xeral de Tráfico, tras ser retirados en guindastre e entregados nun centro autorizado de tratamento de vehículos para o desmonte dos mesmos.
VIXILANCIA “ESTREITA”
A Garda Civil lembra que os axentes encargados da vixilancia e control do tráfico establecen “unha estreita vixilancia” a todos os condutores que “polo seu habitual incumprimento das normas de tráfico pon en alto risco a seguridade viaria”.
Por parte do Grupo de Investigación e Análise de Tráfico (GIAT) vixíase e faise un especial seguimento a aqueles condutores que teñen estas condutas de risco de forma reiterada, sinala.
Ademais das posibles sancións económicas, privación do dereito a conducir vehículos a motor e ciclomotores polo tempo que se determine, este tipo de condutas “pode traer aparellado o ingreso en prisión”, avisa a Garda Civil, ademais do comiso do vehículo tal e como establece o artigo 127 do Código Penal, en relación co artigo 385 bis, “ao considerar o vehículo a motor ou ciclomotor utilizado instrumento do delito”.
