Axentes da Policía Local de Lugo denunciaron aos organizadores dunha festa de aniversario que se estaba celebrando nun piso da cidade e na que participaban dez adultos e seis nenos, todos eles sen máscara.

Ademais, moitas das persoas que estaban a participar na festa non convivían na mesma casa. Entre as medidas adoptadas pola Consellería de Sanidade para evitar contaxios de coronavirus na cidade de Lugo, figura a limitación de celebracións familiares ou sociais a un máximo de dez persoas, excepto no caso de individuos que convivan nunha mesma casa.

Por iso, os axentes, que acudiron á vivenda por mor das queixas doutros veciños -a través do teléfono 092- polas molestias que estaba a producir a festa, cursaron a correspondente denuncia por unha infracción da Lei de Saúde de Galicia. Sucedeu sobre as 21:20 horas do pasado mércores -30 de setembro- nunha vivenda da Rúa do Miño.