O Sindicato Labrego Galego denuncia que o Concello de Guitiriz denegou a súa obriga de asistir á emerxencia do tractor sinistrado en Labrada aducindo que non tiñan chófer para o vehículo de extinción de lumes.
Aconteceu o pasado 17 de agosto, cando un veciño de Labrada sufriu un accidente mentres realizaba labores agrícolas nunha finca, prendendo lume no tractor que manexaba.
O veciño chamou ao 112, que derivou o aviso ao Concello de Guitiriz, o cal posúe unha carroceta de bombeiros. O consistorio guitiricense escusouse da súa obriga e polo tanto, tiveron que acudir os bombeiros de Vilalba.
O camión dos bombeiros de Vilalba non puido acceder á zona do incendio, polo que tiveron que pedir a colaboración da veciñanza e utilizar outra tactor cunha cisterna cargada de auga.
Segundo o Sindicato Labrego Galego, o normal tería sido que prestase asistencia a carroceta de bombeiros do Concello de Guitiriz.
“Non é de recibo que en pleno mes de agosto, coa tempada de alto risco de incendios aínda vixente, e nun municipio catalogado como zona de alto risco para os lumes, os medios de extinción municipais estean paralizados por falta de persoal“, conclúe o sindicato.
