Un incendio declarado no interior dunha nave pequena con rolos de herba seca no municipio de Friol causou danos na construción, pero ningunha persoa resultou ferida. Segundo informou o 112 Galicia, arderon rolos de herba seca que se almacenaban dentro do alpendre e as chamas afectaron “levemente” á súa estrutura.
Os feitos sucederon no lugar do Manxadoiro, na parroquia de Carballo, sobre as nove da mañá deste mércores. Unha persoa contactou co 112 Galicia para alertar do incendio e indicou que ardía unha nave sen actividade na que se gardaba maquinaria agrícola.
Por iso, por parte do CIAE 112 Galicia pasouse o aviso aos Bombeiros de Vilalba, á Garda Civil e á Agrupación de Voluntarios de Protección Civil da localidade. Os servizos de emerxencia finalizaron os labores de extinción do lume sobre as 11:00 horas.
