Os propietarios de Frutigal, cansos dos ladróns: tres roubos en tres meses

Estes froiteiros denuncian que os cacos entraron onte no seu local da rúa Conde, no que xa subtraeran diñeiro hai pouco tempo. No mes de abril, tamén atoparan o seu establecemento da rúa Armórica "esnaquizado".

Froitaría Frutigal, na rúa Armórica de Lugo | Páxinas Galegas

EFE | Os propietarios de dúas froitarías situadas na cidade de Lugo, unha na Rúa Conde e a outra na Rúa Armórica, non ocultan o seu tremendo malestar por ser obxecto de tres roubos nos seus establecementos en apenas uns meses.

Segundo denunciaron os donos de Frutigal, no establecemento que teñen na Rúa Conde, a poucos metros da sede da Delegación Territorial da Xunta de Galicia en Lugo, sufriron dous roubos seguidos en menos de tres meses. O último deles produciuse a principios desta mesma semana, cando lles levaron o diñeiro que había na caixa rexistradora e o que tiñan gardado para o cambio, algo máis de douscentos euros.

Porén, os ladróns non provocaron desfeitas no local en ningún dos casos. Non ocorreu o mesmo cos cacos que asaltaron o establecemento na rúa Armórica, o pasado mes de abril, onde ademais de levar o diñeiro que había na tenda, provocaron importantes danos. “Esnaquizaron” o local, explican os propietarios.

DEIXAR UN COMENTARIO

Please enter your comment!
Please enter your name here