Unha patrulla da Unidade Territorial de Policía de Barrio de Lugo interceptou o pasado 23 de abril ao condutor dun patinete eléctrico a unha velocidade superior á permitida (25 quilómetros por hora) e sen documentación acreditativa da homologación do artefacto.
Segundo explican dende a Policía Local, os axentes procederon a dar o alto ao condutor xa que este tipo de vehículos non poden circular a unha velocidade máis alta ca os de mobilidade persoal. Ademais, “non poden ter asento ou sillín, salvo que estean dotados de sistemas de autoequilibrado”.
O condutor non presentou “ningún tipo de documentación acreditativa da homologación do artefacto”, ao que tampouco se lle localizou “a preceptiva placa do fabricante onde consten as súas características técnicas esenciais”, abundaron fontes policiais.
Por iso, ao ter constancia a Policía Local de que “non se trata dun vehículo de mobilidade persoal que debería circular pola beirarrúa e sen exceder o paso humano” e, ao non presentar documentación para aclarar “se cumpre ou non as condicións necesarias para circular pola vía pública con seguridade para o condutor e resto de usuarios”, os axentes procederon ao seu inmobilización.
Ademais, o condutor foi denunciado por “carecer de permiso de circulación e por non ter concertado seguro obrigatorio”.
A Policía Local asegurou que o vehículo permanecerá inmobilizado “ata que o seu titular acredite que cumpre coas condicións de seguridade básicas para circular polas vías públicas”. Nese caso, advirte, “deberá ser legalizado, matriculado e asegurado”. Así, avisa de que, se non se acreditan tales circunstancias, “só poderá ser utilizado en “terreos particulares”.
