Axentes da Policía Nacional adscritos á Brigada de Seguridade Cidadá de Lugo detiveron a un menor veciño da cidade por incumprimento do estado de alarma tras ser localizado cando baixaba dun coche con outros mozos cunhas litronas. O mozo fora sancionado xa en sete ocasións anteriores.
Segundo informou a Policía Nacional, os feitos sucederon na madrugada deste mércores, cando efectivos de Radiopatrullas observaron na estrada de Ombreiro a tres rapaces que saían dun vehículo que acababan de estacionar. Daquela, os axentes dirixíronse aos ocupantes do vehículo para proceder a sancionar a súa conduta, contraria ao estado de alarma.
Os identificados e ocupantes do turismo manifestaron que “estaban de festa”, co cal se procedeu á súa denuncia. En canto ao condutor, realizóuselle a proba de alcolemia nas dependencias de San Fiz tras acudir ao lugar a Policía Local.
No que se refire ao menor detido, negouse “de forma reiterada arecluírse no seu domicilio”. De feito, comprobouse que horas antes xa fora sancionado e trasladado á súa vivenda por parte da Policía Local.
Debido a iso procedeuse á súa detención e traslado a dependencias da Policía Nacional, onde se realizou o atestado que será remitido á autoridade xudicial. Durante o traslado, e tamén unha vez alí, o arrestado “golpea, insulta e arremete” contra os policías actuantes, segundo destacaron as mesmas fontes, que puntualizaron que non depuxo “a actitude agresiva en ningún momento”. De todo iso informouse ao Ministerio Fiscal, a cuxa disposición será posto este xoves.
