A Policía Local de Lugo interceptou na mañá do martes a un total de sete vehículos nos que os seus ocupantes incumprían as normas de distancia social ditadas polo Ministerio de Transportes, Mobilidade e Axenda Urbana en relación ao coronavirus.

Nun comunicado remitido aos medios, o Concello de Lugo explicou que efectivos da Policía Local detectaron as infraccións en varios controis postos en marcha en distintas rúas do centro urbano.

Os axentes levantaron un total de sete actas de infracción por incumprir o establecido nas normas ao detectar que nos vehículos nos que debe viaxar máis dunha persoa non se respectaba o indicado, é dicir, que viaxase unha persoa por cada fila de asentos.

A Policía Local de Lugo lembrou que as condutas contrarias ao establecido no Real Decreto polo que se declara o Estado de Alarma son consideradas como infraccións graves á Lei de Protección da Seguridade Cidadá, con multas de 601 a 30.000 euros.