EFE | Un veciño de Lugo foi denunciado por axentes do grupo operativo nocturno da Policía Local por mor dos ruídos que estaba a facer no seu propio domicilio e que motivaron as queixas dos seus veciños. Con todo, o suposto infractor alegou que estaba a realizar “teletraballo nocturno”, cando os axentes se presentaron na súa casa.
Sucedeu a pasada noite -do 15 ao 16 de abril-, cando os veciños dun edificio situado na Avenida da Coruña se queixaron a través da presidenta da comunidade das molestias que lles estaba causando un dos propietarios, como consecuencia dos ruídos intempestivos que facía no seu domicilio.
Os axentes da Policía Local que se presentaron no inmoble comprobaron a “veracidade da denuncia” realizada pola comunidade de veciños e identificaron o propietario da vivenda da que proviñan os ruídos.
O home dixo que “estaba a realizar teletraballo nocturno”, pero os axentes levantaron acta por infracción da Ordenanza de Medio Ambiente por mor das molestias causadas aos seus veciños.
