EFE.- Axentes do Corpo Nacional de Policía practicaron 24 detencións en Lugo nos 18 días que levamos de confinamento, ademais de tramitar 288 actas de infracción por vulnerar as medidas incluídas no estado de alarma para frear a expansión do coronavirus.

Segundo informou a Comisaría Provincial, os axentes da Policía Nacional en Lugo “dedícanse case ao completo ao control do estado de alarma e a dar resposta ás demandas dos cidadáns nesta situación excepcional”, algo “posible grazas ao descenso vertixinoso que se produciu en canto á actividade delituosa, ás denuncias presentadas e aos demais servizos”.

Desde o pasado 14 de marzo, “establecéronse filtros e controis de vehículos na cidade de forma continua cunha media de cinco diarios, coa colaboración da BRILAT, Unidade Adscrita da Policía Autonómica e a Policía Local”.

Nese tempo, engade, instruíronse “288 actas de infracción do estado de alarma” e “24 persoas foron detidas”, aínda que algún dos arrestados foi “en dúas ou tres ocasións” pola súa persistencia en vulnerar as medidas de confinamento.  “Nas últimas vinte e catro horas procedeuse á denuncia de vinte e unha persoas por incumprimento das medidas do estado de alarma”, rematan.