Axentes da Policía Nacional detiveron a tres mulleres de 26, 23 e 20 anos veciñas da cidade de Lugo por roubar nunha vivenda.

Segundo informou a Policía Nacional, o pasado venres a media tarde recibiuse aviso dun axente fóra de servizo. Alertaba de que tres mulleres se introduciran nun domicilio da rúa Nazario Abel, en Lugo, tras romper a fechadura de acceso á casa.

Personados os indicativos de Radiopatrullas, procederon a realizar unha inspección no edificio, de dúas plantas, onde comprobaron que se forzou a porta do portal, cuxa fechadura estaba rebentada, e tamén a porta de acceso ao primeiro piso, onde estaban as mulleres que foron detidas.

Segundo explicaron as mesmas fontes policiais, a persoa propietaria do inmoble non reside aí, senón que convive con outros familiares por motivos de saúde. Así e todo, no interior do domicilio estaban as súas pertenzas.

Por todo iso procedeuse á detención e traslado das detidas ás dependencias da Policía Nacional para a súa posterior posta a disposición. Dúas das arrestadas contan con antecedentes por feitos similares.