Axentes da Policía Nacional adscritos á Brigada de Seguridade Cidadá detiveron en Lugo o condutor dun vehículo por un delito contra a seguridade do tráfico tras triplicar a taxa máxima de alcoholemia despois de circular coas luces apagadas e pasar en vermello un semáforo.
Segundo informou a Policía Nacional, o detido é un home veciño da localidade lucense de Guntín de 54 anos. O individuo, ás 5,00 horas da pasada madrugada, cando os policías realizaban as súas funcións habituais polas zonas de comercios e establecementos hostaleiros da cidade, observaron un vehículo que circulaba pola Avenida da Coruña, “coas luces apagadas, facendo eses e pasando os semáforos en fase vermella”.
Por iso, os policías mandáronlle parar e comprobaron como, polo cheiro, estado dos ollos e forma de falar, “estaba claramente baixo os efectos das bebidas alcohólicas”. Con todo iso, e seguindo o protocolo establecido en base á normativa, procedeuse a avisar á Policía Local para que realizase as probas de detección de consumo de alcol e/ou de sustancias estupefacientes.
Unha vez personados no lugar e realizada a primeira proba, obtivo un nivel de alcol en sangue de 0,93 mg/l, polo que foi trasladado a dependencias da Policía local para a confección do correspondente atestado. Pero nese momento negouse á realización da segunda proba, co que a Policía Nacional tivo que facerse de novo cargo da detención e tramitación do atestado por un delito contra a seguridade do tráfico.
Todo iso foi tramitado en dependencias da Policía Nacional da rúa Chantada, onde se lle facilitou servizo sanitario “xa que o seu estado físico debido ao consumo de bebidas alcohólicas estaba moi deteriorado”, indicaron as mesmas fontes.
Na mañá deste venres informouse á autoridade xudicial, mentres o detido quedou en liberdade, segundo o protocolo para este tipo de infraccións, concluíu a Policía.
