Un veciño de Abadín, de 44 anos, permanece ingresado na UCI do Hospital Universitario Lucus Augusti (HULA) como consecuencia das dúas puñaladas que recibiu onte tras a discusión con outro veciño polo estado no que se atopaban uns cabalos.
Así o informaron fontes da Garda Civil, que apuntaron que os feitos sucederon na tarde deste domingo no concello de Abadín. O presunto autor das puñaladas, I.L.C., foi detido por un delito de lesións con arma branca, mentres que o ferido foi evacuado en ambulancia ao HULA, onde quedou ingresado por unha puñalada no abdome e outra á altura do pulmón.
Segundo relatan as mesmas fontes, a lea entre ambos homes foi intensa. Un deles teríase defendido cun obxecto contundente, mentres que o outro usou unha navalla. De feito, tamén o detido presentaba feridas, aínda que de carácter leve e como consecuencia dos golpes.
O arrestado, que pasou a disposición xudicial esta mañá en Mondoñedo, quedou en liberdade.
