A ausencia dunha vítima de agresión sexual, cando era menor de idade, que está en “paradoiro descoñecido”, ante o tribunal da Sección Segunda da Audiencia Provincial de Lugo non impediu a celebración do xuízo contra o presunto agresor, de nacionalidade brasileira, que negou os feitos.
O presidente do tribunal, ao comezo da vista, sinalou que a muller se “atopa en paradoiro descoñecido” e apuntou que había “distintas versións” non oficiais que a situarían en Suíza. Pese ao contratempo, non foi un obstáculo para que se renovase este xuízo, xa suspendido fai máis dun mes polo mesmo motivo, que se levou a cabo lendo o maxistrado presidente a declaración da suposta vítima ante a xuíza instrutora.
Nese testemuño, a moza relataba como mantivera relacións co home que a obsequiaba con “raias de cocaína” ou lle daba 20 euros despois de ter sexo. Nunha desas escapadas furtivas a un hotel do arrabalde da cidade de Lugo, segundo se puxo de manifesto no xuízo, o procesado “supostamente a sodomizara” a pesar das protestas da moza que despois llo comunicou á súa nai. Noutra das ocasións supostamente ameazouna cunha pistola para que non contase nada.
Na vista, celebrada sen a vítima, tanto Fiscalía como acusación particular elevaron a definitivas as súas conclusións, tamén a defensa que interesa a libre absolución aínda que co matiz de que se teñan en conta as atenuantes de “dilacións indebidas” e consumo de drogas.
PETICIÓN DE PENA
O home que na vista anterior negou agredir á menor en 2015 e que negou tamén posuír ningunha arma, enfróntase a unha petición da Fiscalía de 16 anos de prisión, 13 por un delito contra a liberdade sexual e tres máis por retención ilegal.
A acusación particular, que solicita o mesmo que a fiscala, e que representa á nai da moza, nacida en 2000, recoñecía que a presunta vítima “a pesar de estar citada non foi localizada”. “Entón o que faremos é solicitar a inclusión das declaracións sumariais”, sinalou, como ocorreu finalmente xa na Sección Segunda da Audiencia Provincial de Lugo.
A avogada Eva Soilán dixo descoñecer se a moza está no país ou fóra do país. “Non sabemos, está en paradoiro descoñecido”, admitiu, pero dixo que “era moi importante a declaración dela”. “Pero tentaremos que as declaracións sumariales que constan sexan tidas en conta para fundamentar a acusación”, ratificou.
