A Garda Civil detivo na localidade de Castro de Rei os tres presuntos autores de dous delitos de roubo, un delito de furto e un delito de estafa cometidos o pasado mes xuño.

O pasado día 12 de xuño os presuntos autores foron sorprendidos cando cometían un roubo de material de construción nunha nave industrial situada no termo municipal de Castroverde (Lugo).

Así mesmo, tívose coñecemento que horas despois supostamente cometeron un furto de ferramentas no alpendre dunha vivenda situada no mesmo termo municipal.

O mesmo día foi localizada a furgoneta na que circulaban os presuntos autores na estrada N-640 e, ao tentar identificar os ocupantes do vehículo, relataron as mesmas fontes, estes fixeron caso omiso ás indicacións dos axentes. Na súa fuxida tiveron unha saída de vía, tras a que foron identificados os tres homes que ocupaban o vehículo, os cales tiveron que ser auxiliados polos servizos de emerxencia.

No rexistro do vehículo localizouse “gran cantidade de ferramentas e material”, destacou a Benemérita, que interveu os efectos ao sospeitarse da súa procedencia supostamente ilícita.

INVESTIGACIÓN

A Garda Civil iniciou unha investigación que levou ao esclarecemento dos feitos, así como outro delito de roubo con forza cometido durante a madrugada do 5 ao 6 de xuño deste ano nunha parcela anexa a unha nave industrial situada en Castro de Rei, onde supostamente estas mesmas persoas supostamente subtraeron material de construción.

No transcurso da investigación localizouse parte dos materiais subtraídos en Castroverde e en Castro de Rei. O valor total das ferramentas e material de construción subtraído ascende a uns 8.000 euros.

Así mesmo investígaselles como presuntos autores dun delito de estafa ocorrido o 10 de xuño na localidade lucense de Guitiriz, ao irse sen abonar o combustible enchido na área de servizo.

As persoas detidas en relación a estes feitos, sinalou a Garda Civil, foron postas a disposición xudicial.