A nai de Pilar Palacios, a muller asasinada por José Carnero Fernández, coñecido como o Chucán, pediu que o home ingrese nun centro tras a súa saída de prisión.
En concreto, a posta en liberdade do Chucán está prevista ao longo deste mes. Cumpriu a condena de dez anos de cárcere que lle impuxo a Audiencia Provincial de Lugo por matar a Pilar Palacios, unha muller que traballaba nun club de alterne de Ourense.
O crime ocorreu en setembro de 2007 cando Carnero Fernández a foi buscar a Ourense e a levou a Arxemil, en Sober. O cadáver apareceu na cuadra do inmoble con múltiples golpes propinados cunha maza e un machada.
Por estes feitos, o Chucán tivo que ser xulgado en dúas ocasións, xa que o Tribunal Superior de Xusticia de Galicia (TSXG) anulou o primeiro veredicto dun xurado popular que o eximía do crime. O inculpado permaneceu 42 meses en prisión preventiva. A ese tempo sumáronselle os sete anos e medio que estivo no cárcere tras o segundo veredicto.
Tránsito Caballero, nai da vítima, sostén que “ve mal” a saída do cárcere do Chucán, ao lembrar que é a “persoa que lle fixo dano” á súa filla e que “que non está ben da cabeza” polo que “debería de estar nun centro recollido”. “Vaise ver na rúa e non sei se o volverá a facer, esperemos que non”, advirte.
Tránsito Caballero tampouco esconde que lle supuxo un “desgusto” a noticia da posta en liberdade. “Para min é un desgusto porque me gustaría que continuase (no cárcere) o resto da súa vida”, manifestou. Namentres, di, ela vai ter esa dor “toda a vida”. “A pena non ma quita ninguén. Aínda que aprendes a vivir, a pena vai quedar comigo o resto da miña vida”, sinalou para pedir que “Deus” lle dea “o seu merecido ao Chucán”. “A ver se lle dá por tirarse por un barranco, que Deus o perdoe!, eu non o podo perdoar”.
