Axentes do Corpo Nacional de Policía (CNP) investigan o asalto perpetrado na madrugada de onte a dúas tendas situadas no centro comercial As Termas, onde os ladróns actuaron con moita rapidez para facerse cun botín que suma decenas de miles de euros, entre diñeiro en efectivo e teléfonos móbiles.

Segundo informaron a EFE fontes da Comisaría Provincial, de momento só a dirección dunha das tendas asaltadas presentou denuncia, no seu caso polo roubo dunha trintena de terminais, valorados nun importe superior aos 7.000 euros. Espérase que nas próximas horas o outro establecemento asaltado, que estaría a realizar inventario para precisar a contía do roubo, curse tamén a correspondente denuncia ante a Policía Nacional.

Os mesmos informadores precisaron que o roubo tivo lugar de madrugada, a pesar de que o centro comercial conta cun servizo de vixilancia e seguridade que funciona as 24 horas do día, polo que os investigadores presumen que os autores do asalto o tiñan ben planificado.

Esa hipótese vese reforzada, explican, polo feito de que accederon ao centro comercial a través dunha porta lateral -forzaron os peches- e de que actuaron con moita rapidez, “nun visto e non visto”. “Entraron, colleron o que ían buscar e marcháronse”, precisan.

Da investigación fíxose cargo a Policía Xudicial, que xa está a revisar as imaxes de seguridade do centro comercial para buscar pistas que leven á identificación dos ladróns. De momento todas as hipóteses están abertas e non se descarta que o roubo fose cometido por unha banda especializada.