A Garda Civil de Lugo mantén aberta a investigación sobre a morte dunha nena de sete anos na parroquia de Muimenta, no municipio de Cospeito, o pasado venres 3 de maio.
A nai atopouse coa menor falecida pouco despois das 8,00 horas do pasado venres cando a ía a espertar para ir ao colexio. Segundo fontes do Instituto Armado, a “investigación continúa aberta” á espera do que “diga” a xuíza do Xulgado de Instrución Número 1 de Vilalba, que leva a instrución da causa.
Tamén están pendentes dos informes da autopsia preliminar, que foi realizada este domingo e cuxos resultados xa foron remitidos ao xulgado, e do informe toxicolóxico. Mentres, a nai da nena segue hospitalizada na área de Psiquiatría do Hospital Universitario Lucus Augusti (HULA) de Lugo, que é unha zona permanentemente “vixiada”.
A muller, que está separada do pai da menor, xa presentaba un cadro de depresión antes da morte da súa filla. De feito, a nai da nena non acudiu ao funeral por recomendación médica.