O corpo dun home foi localizado sen vida no interior dun vehículo accidentado, en concreto, nun terraplén situado na estrada que une Ribeira de Piquín e A Pontenova, na provincia de Lugo.

Segundo informaron fontes do dispositivo de Emerxencias a Europa Press, o cadáver foi localizado antes das 11.30 horas da mañá deste xoves, e tratábase dun home, A.G.F., duns 53 anos e que residía na zona do Navallo, na Pontenova.

Varios veciños das inmediacións indicaron aos servizos desprazados ao lugar que levaban sen ter noticias del desde fai un par de días.

Emerxencias explicou que o home saíu da estrada co vehículo e precipitouse por un terraplén, para chocar finalmente contra unha árbore. A pesar diso, descoñécense as causas que provocaron o accidente, e as forzas de seguridade están a investigar as circunstancias do suceso.

Na intervención participaron o 061, Bombeiros de Vilalba, a Garda Civil de Tráfico e efectivos de Protección Civil da zona.