A Consellería do Medio Rural deu por extinguido este sábado o incendio forestal de Taboada (Lugo), que permanecía activo desde a tarde do mércores e que afectou finalmente a máis de 55 hectáreas de superficie. O lume iniciouse ás 17.38 horas na parroquia de Ínsua.
Segundo os datos facilitados polo departamento autonómico, as chamas calcinaron 55,85 hectáreas, das que 46,84 correspondían a superficie arborada e outras 9,01 hectáreas a superficie rasa. O incendio quedou oficialmente extinguido ás 11.23 horas deste sábado, despois de varios días de traballos de extinción.
Para facer fronte ao lume mobilizouse un amplo dispositivo, que contou de maneira acumulada con catro técnicos, 27 axentes, 31 brigadas e 30 motobombas. Aos medios terrestres sumáronse tamén catro pas, dúas unidades técnicas de apoio e medios aéreos.
En concreto, no operativo participaron cinco helicópteros e catro avións, ademais dos efectivos despregados sobre o terreo. A extinción pon fin a varios días de intervención para controlar un incendio que afectou principalmente a superficie arborada da parroquia de Ínsua.
