O conselleiro de Sanidade, Antonio Gómez Caamaño, destaca a aposta do Goberno galego por mellorar a sanidade pública en Lugo cun investimento de 3,2 millóns de euros destinada á reforma integral do centro de saúde da Milagrosa, obra que visitou este mércores e na que reiterou ademais o compromiso de construír o futuro centro sanitario do Sacro Corazón en canto o Concello de Lugo ceda os terreos do antigo colexio.
Responde así á pregunta formulada polo alcalde, Miguel Fernández, a pasada semana, cando anunciou que se procederá á expropiación dos terreos, xa que non se conseguiu chegar a un acordo con Afundación, propietaria das leiras. O rexedor anunciou a intención de pór a disposición estes terreos antes de fin de ano e reclamaba á Xunta o compromiso co proxecto. “Esperamos que os terreos nos cheguen máis pronto que tarde para cumprir con outra débeda pendente que temos con Lugo”, asegura o conselleiro.
Gómez Caamaño fixo estas declaracións durante a visita ás obras de reforma do centro de saúde da Milagrosa, na que estivo acompañado polo delegado territorial da Xunta, Javier Arias, e polo xerente da área sanitaria de Lugo, A Mariña e Monforte de Lemos, Ramón Ares.
Durante os próximos meses, un equipo de 25 traballadores levará a cabo a remodelación dun edificio que se converterá nun espazo máis amplo, accesible e moderno, con novos servizos para profesionais e usuarios, “que transformarán por completo as instalacións para adaptalas ás necesidades do século XXI”.
O proxecto abarca unha superficie total de 1.600 metros cadrados, onde se habilitarán seis consultas médicas e outro seis de enfermaría, ademais de dúas salas de docencia, un despacho para o traballador social, dúas salas polivalentes, unha área de técnicas, unha sala de urxencias e outra para a toma de mostras. Tamén se mellorará a zona de admisión e incorporarán dependencias destinadas ao persoal sanitario, como unha sala de xuntas, espazos para docencia e vestiarios.
O conselleiro subliña que a intervención suporá un importante avance en materia de accesibilidade, tanto interior como exterior, coa instalación dun ascensor adaptado para padiolas e a adecuación dos aseos. Así mesmo, renovaranse as fachadas para aproveitar mellor a luz natural nas zonas de espera, mellorando o confort do edificio. Recoñece Caamaño que a obra se fixo esperar, desde 2021, “e sabemos que é moito tempo para este tipo de cousas, pero máis vale tarde que nunca”.
Gómez Caamaño enmarca esta actuación dentro do proceso de modernización que a Xunta está a desenvolver na atención primaria de Lugo. Lembra que a recente posta en marcha do Centro Integral de Saúde (CIS), cun investimento de 16 millóns de euros, permitiu desconxestionar a actividade asistencial da Milagrosa. Antes da apertura do CIS, o centro contaba con 24.000 cartóns sanitarios; unha vez concluída a reforma, atenderá unhas 8.000, garantindo ademais a libre elección de centro para os pacientes.
Segundo explica o conselleiro, “esta reorganización do mapa sanitario permitirá ofrecer máis servizos e unha atención máis cómoda, próxima e de maior calidade”. Engadiu tamén que a mellora do centro de saúde da Milagrosa forma parte da estratexia autonómica para reforzar a atención primaria, que culminará coa construción do novo centro do Sacro Corazón.
