A área de Urbanismo do Concello de Lugo volverá emitir un informe desfavorable sobre o proxecto de ampliación e remodelación da Sociedade Protectora de Animais e Plantas de Muxa. O motivo segue a ser o incumprimento da Lei do Chan de Galicia, que obriga a manter unha separación mínima de cinco metros entre as edificacións e os linderos da parcela.

Trátase do segundo informe técnico municipal, despois do xa emitido en xuño, que advertía da imposibilidade de legalizar construcións que non respectasen a normativa urbanística. O novo documento conclúe que a proposta actual non resolve as deficiencias detectadas, polo que o Concello insiste na necesidade de modificar o proxecto antes de poder aprobalo.

O concelleiro de Urbanismo, Jorge Bustos, subliñou que o Goberno local mantén o seu apoio á legalización e ampliación das instalacións, mais sempre que se axusten á lexislación vixente. “O noso compromiso coa Protectora é firme, pero é imprescindible cumprir a normativa”, apuntou, lembrando tamén que as correccións aínda se poden realizar nesta fase e que xa foron comunicadas á entidade en reunións anteriores.

Bustos incidiu en que o cumprimento da normativa non só afecta ás novas obras, senón tamén á demolición das instalacións actuais que non respecten a distancia obrigatoria. Ademais, sinalou que o expediente continúa pendente da declaración de Incidencia Ambiental, informe vinculante que debe emitir a Xunta a través da Consellería de Medio Ambiente, e cuxo prazo de exposición pública remata o 8 de setembro.