A Audiencia Provincial de Lugo xulgará o vindeiro martes a unha muller para a que a Fiscalía solicita tres anos de cárcere por supostamente estafar diñeiro a través de SMS, coa axuda de ‘hackers’, en Vilalba.

Segundo o escrito de acusación do Ministerio Público, a procesada facilitaría a súa conta bancaria a terceiras persoas non identificadas con coñecementos avanzados en técnicas de fraude informática, quen a utilizaron como medio para recibir fondos obtidos fraudulentamente mediante técnicas de ‘phishing‘, un tipo de ciberataque.

En concreto, unha das vítimas foi inducida a facilitar as súas claves bancarias tras recibir un SMS fraudulento suplantando á entidade Abanca, o que permitiu a extracción de 600 euros mediante un servizo de envío de diñeiro instantáneo (Hal Cash).

Por todo iso, a Fiscalía pide unha pena de tres anos de cárcere e unha multa de 1.800 euros con responsabilidade persoal subsidiaria en caso de falta de pagamento, así como a correspondente indemnización a favor da vítima por importe de 600 euros, cos intereses legais pertinentes.